Академија Пандев поразена во Битола, но уште со големи шанси за финале

Академија Пандев се враќа од Битола со големи шанси за историски пласман во финалето од Купот на Македонија.

Иако поразени со 2-1, во реваншот против Пелистер во Струмица на 11 април ќе ни биде потребна само минимална победа за да се избориме за дуел за трофејот. Можеби можеме да жалиме затоа што имавме и водство на денешниот натпревар по голот на Јани Атанасов во 31. минута, но далеку од тоа дека е нешто загубено.

Пелистер успеа да израмни во 61. минута преку Маневски и потоа во последните моменти Илијовски постигна гол за победа.

Оваа сезона веќе два пати го победивме Пелистер во домашното првенство, а со истиот ривал се среќаваме и во претстојното коло на домашен терен. Еднаш славевме со 2-0 во Струмица и еднаш со 4-3 во Битола, па тоа ни дава надеж дека можеме да го победиме и да обезбедиме пласман во финалето.